Amdanom ni > Gwobr Goffa Wil Petherbridge
Cyflwynir Gwobr Goffa Wil Petherbridge gan Gymdeithas Cyfieithwyr Cymru er cof am ei chyn-Ysgrifennydd ac arloeswr ym myd cyfieithu yng Nghymru. Mae’r Wobr Goffa’n arwydd o werthfawrogiad y Gymdeithas o’r holl waith a wnaeth Wil, yn enwedig wrth sefydlu sylfeini’i threfn arholi.
Etholwyd Wil yn Ysgrifennydd y Gymdeithas yn 1985 pan nad oedd hi’n fawr mwy na siop siarad ddifyr a defnyddiol, a’r tâl aelodaeth yn ddwybunt y flwyddyn. Olynodd ef Mary Jones, yr Ysgrifennydd cyntaf. Bu’n Ysgrifennydd y Gymdeithas hyd 1997.
Wil, yn anad neb, a drodd y Gymdeithas yn gymdeithas broffesiynol. Roedd gan Wil ei syniadau pendant ei hun ynghylch proffesiynoli’r Gymdeithas. Am ei fod wedi sefyll a llwyddo yn arholiadau’r Institute of Linguists a’r Institute of Translation and Interpreting (ITI), roedd yn awyddus iawn i weld y Gymdeithas yn dilyn trywydd tebyg a phroffesiynoli byd cyfieithu Cymraeg/Saesneg. Yn 1989 cafodd berswâd ar y Gymdeithas i sefydlu trefn arholi ac asesu i ymgeiswyr allu ymaelodi â hi. Ef hefyd a luniodd gyfansoddiad cynta’r Gymdeithas a dogfennau eraill a oedd mor hanfodol i gymdeithas a oedd yn tyfu ac yn datblygu’n gyflym.
Brodor o Gaerdydd oedd Wil ac un a oedd wedi dysgu Cymraeg. Bu’n fyfyriwr yng Ngholeg Prifysgol Cymru, Aberystwyth, lle’r enillodd radd dda, ac wedyn MA, yn y Gymraeg. Wedi cyfnod fel athro, symudodd i faes cyfieithu, yn gyntaf o dan Gareth Morris yng Nghyngor Môn, cyn dychwelyd i Aberystwyth wedi iddo gael ei benodi'n gyfieithydd yn ei hen goleg.
Roedd gweithgarwch a dyfalbarhad Wil yn ddiarhebol. Bu’n rhedeg cwrs cyfieithu yn Adran Efrydiau Allanol y Brifysgol yn Aberystwyth am rai blynyddoedd, ac elwodd amryw byd o gyfieithwyr o’i ddilyn. Gwahoddodd ef nifer o aelodau’r Gymdeithas i fod yn diwtoriaid ar y cwrs.
Bu Wil farw yn 2003. Bu ei golli'n ergyd drom iawn, ac erys llawer o’r patrymau a osododd yn sail i waith y Gymdeithas hyd heddiw.
Adeg ei farwolaeth lluniodd Ieuan Bryn deyrnged iddo a oedd yn adlewyrchu teimladau llawer o’i gyfeillion a’i gydweithwyr. Mae’r deyrnged hefyd yn cynnig golwg ddiddorol iawn ar y pwys a roddai Wil ar grefft ac ansawdd cyfieithu.
Caiff Gwobr Goffa Wil Petherbridge, a sefydlwyd yn 2007, ei rhoi i’r ymgeisydd mwyaf addawol am Aelodaeth Sylfaenol, cyfieithu i’r Gymraeg, os bernir bod teilyngdod.
Enillwyr Gwobr Goffa Wil Petherbridge
| 2007 Sarah Astley, Y Drenewydd |
| 2008 Tudur Jones, Pontiets |
| 2009 Catherine Lowe, Tregarth |
| 2010 Elin Davies, Porthaethwy |
| 2012 Elgan Davies, Cricieth |
| 2015 Rhodri Owain, Penmachno |
| 2016 Angharad Edwards, Comins Coch |
| 2017 Aled Meredydd Davies, Bancffosfelen, Llanelli |
| 2018 Cerys Ann Davey, Caerdydd |
| 2019 Nerys Owen, Aberystwyth |
*Cyflogwr yr enillydd adeg ennill y wobr